Rugbyspeler droom groot ná Bokkieweek-keuring
Jay-Cee, 'n leerling van BHS, is as die mees veelsydigste speler vir die span gekies nadat hy homself tydens die keuringsproses vir die Bokkieweek bewys het.
Vir die meeste jong rugbyspelers bly dit ’n droom om op provinsiale vlak raakgesien te word, maar vir die 18-jarige Jay-Cee Wright van Barberton het daardie droom onlangs ’n stap nader aan werklikheid gekom toe hy gekies is om van 6 tot 10 Julie aan die gesogte Bokkieweek deel te neem.
Die rugbyspelers van Hoërskool Barberton wys beslis hul staal met soveel van hulle wat besonder goed vaar op die rugbyveld. Ons het vroeër die week berig oor die sewe spelers wat oorsee gaan toer asook die eerstespan afrigter wat as afrigter van die toerspan gekies is.
Jay-Cee is ook ‘n leerling van Hoërskool Barberton en is as die mees veelsydigste speler aangewys en vir die span gekies nadat hy homself tydens die keuringsproses vir die Bokkieweek bewys het. Die geleentheid bied hom die kans om sy talent teen spelers van regoor die land te meet, maar die finansiële uitdaging om die rugbyweek by te woon, bly ’n groot struikelblok vir sy gesin.
Jay-Cee het in 2018 saam met sy gesin na Barberton verhuis. Hy het sy laerskoolloopbaan aan Barberton Laerskool voltooi en is in 2022 na Hoërskool Barberton, waar hy tans sy finale skooljaar voltooi.
Sy liefde vir rugby het reeds op ’n baie jong ouderdom in die kleuterskool begin toe hy Bulletjie-rugby gespeel het. Dit het deur die jare ontwikkel tot ’n passie wat steeds sterk voortleef.
“Dit is waar my liefde vir die spel begin het,” het hy aan De Kaap Echo vertel. “Van toe af wou ek nog altyd rugby speel.”
Volgens Jay-Cee was sy pa die grootste inspirasie in sy rugbyloopbaan. “My pa was die hoofrede waarom ek begin rugby speel het. Ek het nog altyd opgekyk na hom.”
Soos baie jong spelers het hy ook sy sporthelde gehad. Aanvanklik was Springbok-flank Pieter-Steph du Toit die speler na wie hy opgesien het, maar toe hy in graad 8 as haker begin speel het, het Springbok-haker Malcolm Marx sy grootste rolmodel geword. “Ek het sy spelstyl bestudeer en probeer om dit op my eie manier aan te pas en te verbeter,” het hy gesê.
Hierdie is nie die eerste keer dat Jay-Cee vir die die Bokkieweekspan gekies is nie. Hy het ook in 2025 die span gehaal, maar die span het nie deurgedring na die finaal nie. In plaas daarvan om moed op te gee, het hy harder gewerk en vanjaar weer sy kans gewaag. “Ek het soos altyd my hart uitgespeel op die veld.” Sy deursettingsvermoë is beloon toe hy weer vir die span gekies is.
Vir die Wright-gesin is die keuring ’n trotse oomblik, maar terselfdertyd bring dit finansiële uitdagings mee. Die koste om die week by te woon beloop ongeveer R18 000, wat vervoer, verblyf, etes, kleredrag en ander noodsaaklike uitgawes insluit.
Jay-Cee se ouers is geskei toe hy nog op laerskool was en hy woon by sy ma, wat volgens sy suster, Simoné van Dyk, ’n beperkte inkomste verdien. Sy beskryf haarself as een van sy grootste ondersteuners en help waar moontlik, maar sy het ook nie ’n vaste inkomste nie.
Met die rugbyweek wat reeds gedurende die komende Julie-skoolvakansie plaasvind, hoop die familie dat die gemeenskap en plaaslike besighede sal help om die nodige fondse te help insamel.
Vir Jay-Cee gaan die geleentheid oor veel meer as net een rugbytoernooi. Hy sien dit as nog ’n tree nader aan sy groter doelwitte.
“Ek wil so ver as moontlik met rugby vorder,” het hy gesê. “Dit was nog altyd my droom om vir die Blou Bulle te speel. Daarna wil ek werk om dalk eendag ook die Groen en Goud te dra. Dit is elke rugbyspeler se droom.”
Terwyl die Bokkieweek vining nader kom, hou Jay-Cee vas aan daardie droom en hoop hy dat die ondersteuning van die gemeenskap hom sal help om hierdie belangrike geleentheid aan te gryp en die volgende hoofstuk van sy rugbyreis te begin.
Mariana Balt
Liz Thorne
Naomi Roebert
Comments ()